రైతు బంధు చెక్కుల దుర్వినియోగంలో 23 మంది అరెస్ట్ : అదనపు ఎస్పీ నర్మద

 *రైతు బంధు చెక్కుల దుర్వినియోగంలో 23 మంది అరెస్ట్ : అదనపు ఎస్పీ నర్మద*

- - బ్యాంకు అధికారులు, రెవిన్యూ, దళారులు కుమ్మక్కై 547 చెక్కుల దుర్వినియోగం

- - రూ. 61,50,460 రూపాయల దుర్వినియోగం

- - గుర్రంపోడు, గుడిపల్లి, నాంపల్లి, చింతపల్లి, చండూర్ పోలీస్ స్టేషన్ల పరిధిలో కేసులు నమోదు

నల్లగొండ : జిల్లాలో గత కొద్ది రోజులుగా సంచలనం సృష్టిస్తున్న *రైతుబంధు* చెక్కుల దుర్వినియోగం కేసును నల్లగొండ జిల్లా పోలీసులు ఛేదించినట్లు అదనపు ఎస్పీ శ్రీమతి నర్మద తెలిపారు.

గురువారం జిల్లా పోలీసు కార్యాలయంలో నిర్వహించిన విలేకరుల సమావేశంలో ఆమె కేసు వివరాలు, దుర్వినియోగం అయిన చెక్కులు, కేసుతో సంబంధం ఉన్న బ్యాంకు, రెవిన్యూ అధికారులు, దళారుల వివరాలను ఆమె వెల్లడించారు. తెలంగాణ ప్రభుత్వం 2018 సంవత్సరం మే నెలలో రైతాంగానికి వ్యవసాయ పెట్టుబడి కోసం ఎకరానికి రూ.4,000/-  చొప్పున అందించడానికి ప్రవేశపెట్టిన రైతు బంధు పథకంలో నల్లగొండ జిల్లాలోని గుర్రంపోడు, పెద్ద అడిశర్లపల్లి, చింతపల్లి, నాంపల్లి, చండూర్ మండలాల పరిధిలో రైతాంగానికి చెక్కులు పంపిణీ చేసిన తర్వాత చనిపోయిన వారి పేర్ల మీద, భూమి వివరాలు తప్పుగా పడిన వారి పేర్ల మీద, ఇతర ప్రాంతాలలో ఉంటూ చెక్కులు తీసుకొని రైతుల పేర్ల మీద వచ్చిన చెక్కులను కొందరు రెవిన్యూ అధికారులు, మద్యదళారీలు, బ్యాంకు అధికారులతో కలిసి కుమ్మక్కై అక్రమంగా 547 చెక్కుల ద్వారా రూ. 61,50,460/- నగదును డ్రా చేసి రైతాంగాన్ని, ప్రభుత్వాన్ని మోసం చేశారని అదనపు ఎస్పీ నర్మద వివరించారు. ఈ మొత్తం వ్యవహారంలో అయిదు మండలాల పరిధిలో అయిదు క్రిమినల్ కేసులను నమోదు చేసి 23 మందిని రిమాండ్ కు తరలించినట్లు ఆమె వివరించారు.

ఈ కేసు విచారణలో సమర్ధవంతంగా పని చేసిన దేవరకొండ డిఎస్పీ ఆనంద్ రెడ్డి, నల్లగొండ డిఎస్పీ వెంకటేశ్వర్ రెడ్డి, మల్లేపల్లి సిఐ రవీందర్, నాంపల్లి సిఐ సత్యం, చండూర్ సిఐ మధు, గుర్రంపోడు ఎస్.ఐ. శీనయ్య, గుడిపల్లి ఎస్.ఐ. వీరబాబు, నాంపల్లి ఎస్.ఐ. రఫీ, చింతపల్లి ఎస్.ఐ. వెంకటేశ్వర్లు, పోలీస్ సిబ్బందిని ఆమె అభినందించారు.